ฯ นโม ตสฺส ภควโต อรหโต สมฺมาสมฺพุทฺธสฺสฯ
ขุทฺทสิกฺขา-มูลสิกฺขา
ขุทฺทสิกฺขา
คนฺถารมฺภกถา
(ก)
อาทิโต อุปสมฺปนฺน-สิกฺขิตพฺพํ สมาติกํ;
ขุทฺทสิกฺขํ ปวกฺขามิ, วนฺทิตฺวา รตนตฺตยํฯ
ตตฺรายํ มาติกา –
(ข)
ปาราชิกา จ จตฺตาโร, ครุกา นว จีวรํ;
รชนานิ จ ปตฺโต จ, ถาลกา จ ปวารณาฯ
(ค)
กาลิกา จ ปฏิคฺคาโห, มํเสสุ จ อกปฺปิยํ;
นิสฺสคฺคิยานิ ปาจิตฺติ, สมณกปฺป ภูมิโยฯ
(ฆ)
อุปชฺฌาจริยวตฺตานิ, วจฺจปฺปสฺสาวฐานิกํ;
อาปุจฺฉกรณํ นคฺโค, นฺหานกปฺโป อวนฺทิโยฯ
(ง)
จมฺมํ อุปาหนา เจว, อโนโลกิยมญฺชนี;
อกปฺปิยสยนานิ, สมานาสนิโกปิ จฯ
(จ)
อสํวาสิโก จ กมฺมํ, มิจฺฉาชีววิวชฺชนา;
วตฺตํ วิกปฺปนา เจว, นิสฺสโย กายพนฺธนํฯ
(ฉ)
ปถวี จ ปริกฺขาโร, เภสชฺชุคฺคหทูสนํ;
วสฺสูปนายิกา เจวาเวภงฺคิยํ ปกิณฺณกํฯ
(ช)
เทสนา ฉนฺททานาทิ, อุโปสถปฺปวารณา;
สํวโร สุทฺธิ สนฺโตโส, จตุรกฺขา วิปสฺสนาติฯ
1. ปาราชิกนิทฺเทโส
ปาราชิกา จ จตฺตาโรติ –
[1]
มคฺคตฺตเย อนิกฺขิตฺตสิกฺโข สนฺถตสนฺถเต;
อลฺโลกาเส นิมิตฺตํ สํ, ติลมตฺตมฺปิ สนฺถตํฯ
[2]
อสนฺถตมุปาทิณฺณํ, ปเวสนฺโต จุโตถ วา;
ปเวสนฏฺฐิตุทฺธารปวิฏฺฐกฺขณสาทโกฯ
[3]
อาทิเยยฺย หเรยฺยาวหเรยฺย อิริยาปถํ;
โกเปยฺย ฐานา จาเวยฺย, สงฺเกตํ วีตินามเยฯ
[4]
อทินฺนํ เถยฺยจิตฺเตน, ภเว ปาราชิโกถ วา;
เถยฺยาพลกุสจฺฉนฺนปริกปฺปาวหารโก;
ภณฺฑกาลคฺฆเทเสหิ, ปริโภเคตฺถ นิจฺฉโยฯ
[5]
มนุสฺสวิคฺคหํ จิจฺจ, ชีวิตา วา วิโยชเย;
สตฺถหารกํ วาสฺส มรณเจตโน อุปนิกฺขิเปฯ
[6]
คาเหยฺย มรณูปายํ, วเทยฺย มรเณ คุณํ;
จุโต ปโยคา สาหตฺถินิสฺสคฺคาณตฺติถาวราฯ
[7]
อิทฺธิวิชฺชามยา กาลวตฺถาวุธิริยาปถา;
กฺริยาวิเสโส โอกาโส, ฉ อาณตฺตินิยามกาฯ
[8]
ฌานาทิเภท โนสนฺตมตฺตนตฺตุปนายิกํ;
กตฺวา โกฏฺฐาสเมเกกํ, ปจฺจุปฺปนฺนภวสฺสิตํฯ
[9]